Bir kəlmə söz desə ürək dayanar,
Allah bu gözəli necə yaratdın.
Toxunsa bir ömür ömrüm uzanar,
Allah bu gözəli necə yaratdın.

Təbibin müqəddəs nişanəsidir,
Dağların gurlayan şəlaləsidir,
Xəstənin dərmansız bir çarəsidir,
Allah bu gözəli necə yaratdın.

Sevgidən yoğrulub sanki mayası,
Təbii gözəldir yoxdur boyası,
Üzündən bilinir arı, həyası,
Allah bu gözəli necə yaratdın.

Dünyaya hava tək, su tək gərəkdir,
Göydən yerə enmiş nəcib mələkdir,
Qoxusu ətirli güldür, çiçəkdir,
Allah bu gözəli necə yaratdın.

Ay görsə günəşin üzünə baxmaz,
Ulduzlar səmaya bir daha çıxmaz,
Çaylar da quruyar dənizə axmaz,
Allah bu gözəli necə yaratdın.

Ox kimi düzülüb kipriyi, qaşı,
Səhv salar saçını ipəkdən naşı,
Gözləri gecənin əkiz sirdaşı,
Allah bu gözəli necə yaratdın.